वैदेशिक रोजगारीमा पठाउने भन्दै महांकाल गाउँकी एक किशोरीको राहदानी बनाउन खोज्ने युवकलाई जिल्ला अदालत सिन्धुपाल्चोकले मानव बेचबिखन तथा ओसारपसार ऐनअन्तर्गत सोमबार पुर्पक्षका लागि थुनामा राख्ने आदेश दिएको छ । उमेर बढाएर नागरिकता बनाउने र विदेशमा राम्रो काममा लगाउने प्रलोभनमा चेलीलाई धमाधम झुक्याउन थालेपछि जिल्ला न्यायाधिवक्ता कार्यालयले महांकाल ३ का रुकबहादुर तामाङविरुद्ध बेचबिखन अभियोगमा मुद्दा दायर गरेको थियो । जिल्ला न्यायाधीश अजयराज उपाध्यायको एकल इजलासले तामाङलाई थुनामा राख्ने आदेश दिएको थियो । मानव बेचबिखन घटनाका पीडितको पक्षमा बहस पैरवी गर्दै आएका अधिवक्ता भेषराम ढकालका अनुसार जिल्लामा चेलीलाई वैदेशिक रोजगारीमा पठाउने दलालविरुद्ध बेचबिखन अभियोगम मुद्दा चलाएको यो घटना हो ।

तामाङले महांकालकी एक १६ वर्षे किशोरीलाई उमेर बढाएर नागरिकता र राहदानी बनाउन सघाएका थिए । किशोरीलाई रोजगारीका लागि जोर्डन पठाउने भन्दै पुस ८ गते राहदानी बनाउन खोज्दा तामाङ पक्राउ परेका हुन् । ठूलो बाबु उर्वोन तामाङ नक्कली बाबु बनेर नागरिकता बनाइसकेपछि राहदानीको सिफारिस लिने क्रममा रुकबहादुर पक्राउ परेका थिए । किशोरीको उमेर १८ वर्ष बनाएर नागरिकता लिएको थियो । ठूलो बाबु र किशोरीलाई जिल्ला प्रशासनले नागरिकता ऐनअन्तर्गत धरौटीमा छाडेको छ । 

Published on: 23 January 2014 | Kantipur